ჯანეტ ქერდიყოშვილი: "არა მგონია, რომ სექსუალური გოგო ვიყო, უფრო საყვარელი ვარ"
ვისაც იმედი აქვს, რომ მოდელ ჯანეტ ქერდიყოშვილს უმაკიაჟოდ ან ცუდად ჩაცმულს "გამოიჭერს", ამაოდ მოცდება. რაც ჯანეტი "მის საქართველო" გახდა, გარეგნობას დიდ ყურადღებას უთმობს, მოუწესრიგებელი გარეთ არასოდეს გადის. კლასიკა, შეხამებული ფერები, აქსესუარები – მისი სტილია, რომელშიც თავს კარგად გრძნობს. ფერებს მასზე დიდი ზეგავლენა აქვს. თუ რა განწყობაზეა, იმის მიხედვით ადვილად გამოიცნობთ, რა აცვია. არ აღიარებს სპორტულ ტანსაცმელს, ასეთში თავი ვერც კი წარმოუდგენია. მის ჩაცმულობას ჯერჯერობით არავინ აკონტროლებს, ოჯახი ამ საკითხში სრულ თავისუფლებას ანიჭებს, თუმცა დედისგან რჩევები კი სჭირდება.
– ჯანეტ, მას შემდეგ, რაც პოპულარული გახდით და ხალხის ყურადღების ცენტრში მოექეცით, თქვენი ჩაცმის სტილი, ზოგადად გარეგნობისადმი დამოკიდებულება შეიცვალა?
– ადრე შემეძლო, მაღაზიაში ისე ჩავსულიყავი, როგორც მინდოდა, ახლა კი ასე ვეღარ მოვიქცევი. ჩემზე ისედაც ბევრს ლაპარაკობენ, ამიტომ მაკიაჟსაც ვაქცევ ყურადღებას, თმასაც და ჩაცმულობასაც.
– რას ლაპარაკობენ თქვენზე?
– ეძებენ, რა არის ჩემში ცუდი, იქნებ როგორმე მაკიაჟის გარეშე "გამომიჭირონ" და თქვან, რა მახინჯია, რა აცვიაო... ერთი სიტყვით, საკუთარი თავის მიმართ ახლა უფრო ყურადღებიანი ვარ. 14 წლის ასაკიდან, როდესაც დავინახე, რომ ბიჭები ყურადღებას მაქცევდნენ, სახლიდან გაწეწილი თმით ან დაგლეჯილი შარვლით არ გავდიოდი. ამიტომ ვერ ვიტყვი, რომ ჩემი გარდერობი ძალიან შეიცვალა.
– თქვენი გარდერობით თუ ვიმსჯელებთ, კლასიკურ სამოსს ანიჭებთ უპირატესობას.
– კედები რომ მოდაში შემოვიდა, ვიფიქრე, მეც ვცდი, როგორია–მეთქი. რამდენიმე წყვილი ვიყიდე, მაგრამ ერთხელაც არ ჩამიცვამს. მივხვდი, რომ ჩემი არ არის, არადა მომწონს, როდესაც გოგოს ჯინსები, კედები და თავისუფალი მაისური აცვია. ძირითადად კლასიკურად ვიცვამ. დაბალძირიანი ფეხსაცმელებიც მიყვარს, ძნელია ყოველთვის მაღლებით სიარული, მით უმეტეს უნივერსიტეტში. უნდა იცოდე, როდის რა ჩაიცვა. არ მომწონს, როდესაც საღამოს მაკიაჟს დღისით იკეთებენ და წითელ პომადას ისვამენ.
– ესე იგი თქვენთვის დრესკოდი ძალიან მნიშვნელოვანია, რასაც ქართველების უმეტესობაზე ვერ ვიტყვით.
– რუსეთში დიდხანს ვცხოვრობდი და, შემიძლია გითხრათ, რომ რუსებთან შედარებით ქართველები ძალიან გემოვნებიანი ხალხი ვართ. მათ ფული აქვთ, მაგრამ ფერების შეხამება არ იციან. ჩვენ შეგვიძლია არც ისე ძვირადღირებული სამოსი ორიგინალურად ჩავიცვათ. რუსეთში საშუალო ფენა ჩვეულებრივად იცვამს.
– თქვენ ფერებს თამამად უხამებთ ერთმანეთს?
– სხვაზე მიყვარს ბევრი ფერი ერთად, მაგრამ მე მხოლოდ სამს თუ გამოვიყენებ სამოსში.
– რა ფერებს იხდენთ ყველაზე მეტად?
– მიხდება ლურჯი, ფირუზისფერი, მწვანე, შავი. მიყვარს თეთრიც. რატომღაც ვარდისფერს და სტაფილოსფერს ვერ ვიტან. დიდად არც ნაცრისფერი მომწონს. დილით თუ ფერად სამოსს ჩავიცვამ, მთელი დღე ხალისიანად ვარ. თუ ცუდ ხასიათზე ვიღვიძებ, შეიძლება შავი ან ნაცრისფერი სამოსით გავიდე გარეთ. ეს ყველამ იცის და მეკითხებიან ხოლმე, დღეს რა გჭირსო. თუ გამოპრანჭული ვარ და ფერადი სამოსი მაცვია, ე.ი. ჯანეტი კარგადაა და მის ცხოვრებაში ყველაფერი მშვენივრადაა.
– იმიჯზე ზრუნვას დიდი დრო მიაქვს?
– მიყვარს შოპინგი. შეიძლება საკმარისი თანხა არ მქონდეს, მაგრამ მაღაზიებში მაინც დავდივარ და სამოსს ვიზომებ. თუ რაღაც მომწონს, ვფიქრობ, მერე ვიყიდი–მეთქი. თუ ცუდ ხასიათზე ვარ, შეიძლება ტკბილეულის ჭამამ გამომიკეთოს გუნება და კიდევ, როდესაც რაღაც ახალს ვყიდულობ, თუნდაც უბრალო ბეჭედი იყოს, უკვე კარგად ვარ.
– ქალებისთვის ფეხსაცმელი და ჩანთა ჩაცმულობაში ძალიან მნიშვნელოვანი დეტალებია, ისინი აუცილებლად მოდური და ლამაზი უნდა იყოს. თქვენ როგორ ფიქრობთ?
– ყოველთვის ვამბობ, რომ ქალისთვის მთავარი ფეხსაცმელი და ჩანთაა. რატომღაც აჩემებული აქვთ, რომ აუცილებელია ჩანთა და ფეხსაცმელი ერთ ფერში იყოს, რასაც არ ვეთანხმები. რაც შეეხება მამაკაცებს, მგონია, რომ მათთვის ყველაზე მნიშვნელოვანი საათია და არა – ფეხსაცმელი.
– თქვენ მამაკაცის შეფასებას საათით იწყებთ?
– ასეა. ბიჭები მანდილოსანზე ალბათ საათს დიდად არ აკვირდებიან, მათთვის ფეხსაცმელი იქნება მთავარი.
– სამკაულები გიყვართ?
– 2–3 წლის წინ ბიჟუტერიას ვერ ვიტანდი. არც ოქრო მიყვარდა, მაგრამ მერე ტენდენციები შეიცვალა და ახლა უკვე ოქროზე ვარ გადასული. მოოქროვილი ბიჟუტერიაც მიკეთია. ერთადერთი, რაც არ მიყვარს, ყელსაბამია. მხოლოდ ჯვარს ვიკეთებ. ჩემი საყვარელი აქსესუარი საათია. მჭირდება კიდეც დროის კონტროლი. საათი ყოველთვის 5 წუთით გვიან მაქვს დაყენებული, რომ არ დავაგვიანო.
– თქვენი დაკვირვებით, ბიჭებს გოგოები როგორ ჩაცმულობაში უფრო მოსწონთ?
– დავაკვირდი, მამაკაცებს გოგონებში ბუნებრიობა მოსწონთ. მეგობრები მეც მეუბნებიან, ბევრი მაკიაჟი არ გაიკეთოო და ასეც ვიქცევი. ზედმეტად რომ ვიპრანჭებით, გვგონია, რომ ლამაზია, მაგრამ ბიჭებს ეს საერთოდ არ მოსწონთ. არ უყვართ, ვულგარულად ჩაცმული გოგოები. შეიძლება მაგარი ტანი და ფეხები გქონდეს, მაგრამ არაა აუცილებელი მოკლე კაბის ჩაცმა. ამბობენ, ჯინსის შარვალშიც შეგვიძლია თქვენი მაგარი ფეხების დანახვაო.
მამაჩემი ძალიან მკაცრია, მაგრამ არც მისგან და არც ჩემი ძმისგან არასოდეს მომისმენია, რა გაცვიაო. ყოველთვის ვიცი, სად რა უნდა ჩავიცვა, გამომწვევად არასოდეს ვიცვამ. ჩვენი ჩაცმულობა ჩვენს ხასიათს გამოხატავს.
– თქვენ როგორი ჩაცმულობა მოგწონთ მამაკაცებზე?
– არ მომწონს, როდესაც 35 წლის კაცს ბიჭურად აცვია. საშინლად არ მომწონს, ბიჭს სპორტულად რომ აცვია, ვგულისხმობ ჯინსის შარვალს, ბოტასებს და მაისურს.
– უმეტესობას ასე აცვია.
– ნამდვილად ასეა. ყველა ერთნაირად ჩაცმული დადის. ჯინსზე პერანგი და პიჯაკი – ეს ჩემთვის იდეალურია. ამავე დროს ბიჭი აუცილებლად მოვლილი უნდა იყოს. სულაც არ არის ცუდი, ბიჭმა წარბები გაიკეთოს და ფრჩხილები სალონში მოიწესრიგოს. სავალდებულო არ არის, ლაქი წაისვას, მაგრამ ხელები მოვლილი უნდა ჰქონდეს.
– ჩაცმულობით თქვენს გარეგნობაში რას უსვამთ ხაზს?
– არა მგონია, რომ სექსუალური გოგო ვიყო, უფრო საყვარელი ვარ. ბევრ ქალს აქვს შინაგანი შარმი, მე კი – არა. რაც უნდა სექსუალურად ჩავიცვა, შემომხედავთ თუ არა, მაშინვე მიხვდებით, რომ ვიღაცამ ჩამაცვა ასე და ეს ჩემი არ არის. ხანდახან, როცა ბავშვობა ძალიან მენატრება, დაბალძირიან ფეხსაცმელს ვიცვამ, სათვალეს ვიკეთებ და ჩემთვის დავდივარ.
– ჩაცმის საკითხში ვინმეს აზრს ითვალისწინებთ?
– დედაჩემის, თუმცა ძალიან დამოუკიდებელი ვარ და ჩემითაც ვიღებ გადაწყვეტილებებს. საერთოდ, ქალი ყოველთვის ვიღაცისთვის იცვამს. მე კი, პირველ რიგში, საკუთარი თავისთვის ვიცვამ და მერე – სხვებისთვის. როცა მეორე ნახევარი გყავს, რა თქმა უნდა, იმას ჩაიცვამ, რაზეც გეტყვის, რომ ყველაზე მეტად გიხდება. რადგან მე არც გათხოვილი ვარ და არც შეყვარებული მყავს, ამიტომ დედიკოს ვუჯერებ.
– საყვარელმა ადამიანმა აკრძალვები რომ დაგიწესოთ, შეეგუებით?
– თუ ამიხსნის, რატომ არ უნდა ჩავიცვა ის, რაც მე მინდა, მაშინ მის აზრს გავითვალისწინებ. აუხსნელად კი არ დავთმობ! ჩემი ძმაც კი ჩემი გემოვნებით იცვამს. როდესაც საყიდლებზე წასვლა უნდა, მირეკავს და დიდი სიამოვნებით მივყვები. ზოგჯერ მისთვის უფრო მსიამოვნებს სამოსის შერჩევა, ვიდრე საკუთარი თავისთვის.
– თავად ერევა თქვენს ჩაცმულობაში?
– არა, მხოლოდ ერთი რამ არ მოსწონს, როდესაც მკვეთრი მაკიაჟი მაქვს. ერთი–ორჯერ კასტინგზე თუ გადაღებაზე დეკოლტეს ჩაცმა მომიწია და, რადგან ჩემს ასეთ ჩაცმულობას მიჩვეული არ არის, მითხრა, ეს რა არის, რა გაცვია, მალე გამოიცვალე, ასე არ დამენახოო. ვუთხარი, შენი და ვარ და იმიტომ არ გსიამოვნებს, თორემ ვიღაც უცხო რომ ვიყო, ხომ მოგეწონებოდი–მეთქი. მითხრა, მაინც არ მომეწონებოდაო.
– გარდერობში ალბათ განსაკუთრებულად საყვარელი სამოსიც გექნებათ.
– ყველაფერი მიყვარს, რაც გარდერობში მაქვს. დუბაიში ქორწილში წასასვლელად კაბა ვიყიდე, რომელიც განსაკუთრებულად მიყვარს და ასევე გამორჩეულად მომწონს ჩემი ერთი წყვილი ფეხსაცმელი. ამ ორ რაღაცას არავის მივცემ. სულ მინდოდა ეს ფეხსაცმელი, ამიტომ ფული შევაგროვე, მამიკომაც დამიმატა და ვიყიდე.
– თქვენი სამოსი ბრენდებისგან შედგება?
– ჩემს გარდერობში როგორც ძვირადღირებული ბრენდების, ასევე "ზარას" ყოველდღიურ სამოსსაც ნახავთ. არაა სავალდებულო, აუცილებლად ძვირფასი ტანსაცმელი გეცვას. ზოგი ძალიან მაგარი მანქანით და სამოსით დადის, ამ დროს კი ნაქირავებ ბინაში ცხოვრობს. ადამიანში უბრალოებას ვაფასებ.
ქეთი დინოშვილი
